Lentswe le le nonofileng
“Babilone o mogolo o ole, o ole, o fetogile boago jwa mewa e e maswe, le boitswalelo jwa mowa mongwe le mongwe o o maswe, le boitswalelo jwa nonyane nngwe le nngwe e e maswe le e e ilwang…Ka utlwa lentswe le lengwe le le tswang legodimong le re: Tswang mo go ene batho ba me, go re le se tlhakanaele nae dibe tsa gagwe, le go re le se bone dipetso tsa gagwe. Gonne dibe tsa gagwe di ile go fitlha le ko legodimong. Modimo o gakologetswe maikepo a gagwe” Tshenolo 18:2,4,5
Makgapa a a diragalang mo phuthegong ya SDA, a diragatsa porofiso e e boletsweng ke moporofiti Ellen White jaaka a ne kwala mo Letter 242 ka 1903, fa a ne a tlhagisa phuthego go re, fa ba gana go tswa mo seemong sa Laodikea sa go nna bothito (Tshenolo 3:16), Satane o tla tlisa phetogo e kgolo mo gare ga Seventh Day Adventists, e e tla felelang ka “sefefo le setsuatsue” se se tla digang “kago ya bone”. “Sefefo le setsuatsue” ke go senngwa ga SDA le Babilone yotlhe ka dipetso tsa bofelo tse 7.
Porofiso e e tshwana le ya Ezekiele 9. Modimo o ne a raya banna ba ba tshotseng sebolao a re “Bolaelang ruri monna mogolo, lekau le morweetsana, le bana ba ba nnye le basadi, mme lo se ka lwa atamela ope yo lotshwao le mo go e ne”
Ka jaalo ke a lo rapela, botlhe ba ba santseng ba le mo SDA, tswang mo go ene pele ga dipetso di tla. Ka go re fa o sa ntse o le leloko la SDA, o pataganetse le bone dibe. Ela tlhoko gore tshiamo ya ga Keresete e gape e leng sekano sa Modimo, ke yone fela tshireletso kgatlhanong le dipetso tse 7 tsa bofelo, mme ga e kake ya newa motho fa a santse a le mo boleong kgotsa a tlhakanetse dibe le phuthego ya Babilone. Ke sone se Modimo a reng “Tswang mo go ene lona batho bame, gore lo se tlhakanele nae dibe tsa gagwe, le gore lo se amogele dipetso tsa gagwe”
O se ka wa tsietswa ke ba ba reng Modimo o tla ntlaafatsa SDA, a ntsha ba ba sa siamang go sala ba ba phepa. Modimo ga a kake a ntlafatsa phuthego e a ntshitsweng mo yone. Porofiso ya re “mme ka gore Modimo o tlositswe, ba tla ikaega mo nonofong wa setho, e e senang mosola ka ntlha ya go tlhoka Modimo mo teng”. Phetogo e ya ga Satane ga e simologile ga e ka ke ya ema go fitlhela “Sefefo le setsuatsue” di tla, ka gore “Ga go na se se tla letelelwang go ema fa pele ga mokgatlho o mosha o”. Ke sone se e rileng moporofiti a sena go fiwa molaetsa o, a bolelelwa go re a dire gotlhe mo a ka go kgonang go kganela go re phetogo e ya ga Satane e se ka ya nna teng. A re, “Ke ne ka fiwa ditaelo go re….e kgatlhantshe!…mme e rile mo malatsing a latelang ke ne ka bereka bosigo le motshegare, ke baakanyetsa batho ba rona melaetsa kgatlhanong le dithuto tse di phoso tse di neng di tla mo go rona” Selected Messages Book 1 p.206.
Ka tshegofatso ya Modimo o ne a kgona go e emisa maikaelelo a ga Satane, mme e rile a sena go tlhokafala le bagololo ba phuthego, Satane a simolola maikaelolo ya gagwe mo phuthegong ya SDA. O simolotse ka go rotloetsa go re phuthego e amogele Church Manual kgotsa Lokwalo Lwa Melawana Ya Kereke ka ngwaga wa 1930. Se se ra ya gore phuthego ya SDA ga e sa tlhole e setse Baebele morago, e setse Lokwalo Lwa Melawana Ya Kereke morago. Pele ga 1930 ka 1883, Satane o ne a leka go tlhotlheletsa phuthego ya SDA go amogela Lokwalo La Melawana, mme phuthego e ne ya gana mogopolo o. Ba ne ba ba gana ka mabaka a latelang: “Baebele e tshotse dithuto tsa tumelo le melawana ya rona. E iketleeletsa monna wa Modimo tiro nngwe le nngwe e e molemo. Se e sa se senolang mabapi le ditiro tsa babereki ba phuthego, ga se a tshwanelwa ke go kwalwa e le melawana ee tshwanetsweng ke go salwa morago go re go nne le go tshwana, mme re tshwanetse ra tlogela se mo diatleng tsa mmereki go re a tle a kaelwe ke Mowa O Boitshepo. Fa go ne go tshwanetse go re lokwalo lwa melawana le nne teng, Mowa O Boitshepo o ka ne a re tlogeletse sekai.” Advent Review and Sabbath Herald, Vol. 60, No. 47, November 27, 1883, G.I. Butler.
E rile Satane a sena go rotloetsa SDA go re ba amogele Lokwala Lwa Melawana, le go tlosa ketelelo pela ya Mowa O Boitshepo, a diragatsa phetogo e a neng a e batla ka mashetla, bogolo jang ka di ngwaga tsa bo 1960, ka go dira go re SDA e kwale lokwalo la Questions on Doctrine kgotsa Dipotso Ka Dithuto Tsa Tumelo, e e neng e nyenyefatsa dithuto tsa tumelo tsa motheo wa SDA. Ke sone se se dirileng gore dintlha tsotlhe tsa porofiso e be di diragetse ko ntle ga “Sefefo le setsuatsue” se e leng dipetso tsa bofelo tse 7.
Go feferwa mo diragalang gompione, ke fa gare ga Masalela, bao ba ba duleng mo SDA. Fa Modimo a ka go thusa, wa kgaogana le SDA, ka go obamela lentswe la Gagwe fa a re “tswang mo go ene lona batho bame” Tshenolo 18:4, o thswanetse gape wa reetsa kgakololo ya Mosupi Yo Boammaaruri go re o reke mo go ene “molemo wa matlho” go re o tle o kgone go farologanya ba e leng Masalela a nnete, le ba e seng ba nnete, le fa gare ga tshiamo ya ga Keresete le tshiamo ya setho. O bo o reke gape “diaparo tse di tshweu” go re o apare tshiamo ya ga Keresete, le “gauta e e ntlafaditsweng ke molelo” go re o tle o nne le lorato le tumelo ya ga Keresete (Tshenolo 3:18)
Ga re kwale mafoko a go le utlwisa bothoko bakaulwengwe, mme ke ka go re, re tshwenyegile ka mewa ya lona, ka go re le rekilwe ka tlhotlhwa e kgolo, e bong madi a Morena Jeso Keresete.
Andrei Lesiapeto