Dithuto tsa ga Keresete ka ditshwantsho

Go tlhoka seaparo sa lenyalo–Mathaio 22:1-14

Setshwantsho sa seaparo sa lenyalo se re supentsha thuto ya ditlamorago tse di ko godimo. Lenyalo le emetse bokapano jwa setho le bomodimo; seaparo sa lenyalo se emetse popego e botlhe ba tshwanetseng ke go nna le yone gore ba amogelesege jaaka balalediwa ba lenyalo.

Fela jaaka setshwantsho sa mong wa ntlo (sa modiro wa dijo tse dikgolo tsa maitsibowa), setshwantsho se, se supa tlaletso ya mafoko aa molemo le go ganwa ga one ke Bajuta, le tlaletso ya kutlwelo botlhoko go ya ko go baditšhaba. Mme mo go ba ba ganneng tlaletso, setshwantsho se se supa lenyatso le le golo le kotlhao e boitshegang. Tlaletso ya lenyalo e tswa ko kgosing. E tswa ko go yo nang le nonofo ya go laola. Ka jalo ba ba laleditsweng ba filwe tlotla e kgolo. Mme tlotla e, ga ya tlhomphiwa. Taolo ya kgosi e nyaditswe. Fa tlaletso ya mong wa ntlo e ne ya itlhokomolosiwa, ya kgosi yone, e ne ya kopantshiwa ke ditlhapa le loso mo go ba neng ba rumilwe. Ba ne ba sota, le go bolaya batlhanka ba ba rumilweng.

Mong wa ntlo, fa a bona tlaletso ya gagwe e nyaditswe, o ne a re ga go ope wa ba ba laleditsweng yo tla isang ko ganong dijo tsa modiro wa gagwe. Mme ba ba nyaditseng kgosi bone, ga se fela gore ga ba na go tsena mo modirong wa gagwe. Re bolelelwa gore, “Mme kgosi ya nna bogale, ya tloga ya bolotsa masole a yone, ya senya ba bolai, ya fisa motse wa bone”

Mo ditshwantshong ka bobedi modiro o na le balalediwa, mme mo go wa bobedi go supafala go na le go ipaakanya mo go ba ba tsena mo modirong. Ba ba ganang go ipaakanya ba latlhelwa kwa ntle. “E rile kgosi e tsena e tla go bona balalediwa, ya bona motho teng yo o sa aparang seaparo sa nyalo. Mme ya mo raya ya re: ‘Tsala, o tsenye jang fano o se na seaparo sa nyalo?’ Mme a tlhoka se a se buang. Foo kgosi ya raya batlhanka ya re: Mmofeng mabogo le maoto lo mo latlhele kwa ntle, kwa lefifing le le kwa ntlentle; go tlaa nna selelo le phuranyo ya meno gone.”

Tlaletso ya modiro e dirilwe ke barutwana ba ga Keresete. Morena o ne a roma ba le 12 mme ko morago ba le 70, ba bua gore bogosi jwa legodimo bo atlametse, ba re batho ba ikotlhaye ba dumele mafoko a molemo. Mme pitso ya seka ya tsewa tsia. Bao ba neng ba laleditswe ko modirong ba seka ba tla. Batlhanka ba ne ba rongwa gape morago gore ba re, “Bonang, ke baakantse modiro wa me; dipholo tsa me le tse di nonneng di tlhabilwe, dilo tsotlhe di baakantswe; tlang modiro wa lenyalo.” O ke molaetse o neng o fiwa Bajuta morago ga papolo ya ga Keresete; mme tšhaba e neng e ipitsa gore ke ya Modimo e ne ya gana mafoko a molemo a tliswa ka nonofo ya Mowa O Boitshepo. Bontsi bo ne ba dira se ka lenyatso le le golo. Ba tlhasela barongwa. Mme ga nna le “pogisego e kgolo” Ditiro 8:1. Bontsi ja barongwa ba ne ba latlhelwa mo kgolegelong, bangwe jaaka Setefane le Jakobe ba ne ba bolawa.

Ka jalo Bajuta ba ne ba kanele go gana boutlwelo botlhoko jwa Modimo. Maduo a, a ne a bolelwa ke Keresete mo setshwantshong. Mme kgosi “ya bolotsa masole a yone, ya senya ba bolai, ya fisa motse wa bone”. Katlholo e, e ne ya diragala mo Bajuteng ka go senngwa ga Jerusalema le go phatlalatswa ga morafe.

Tlaletso ya boraro go tla modirong e emetse go rerwa ga mafoko a molemo go ba ditšhaba. Kgosi ya re: “Nyalo yone e baakantswe, mme ba ba neng ba e laleleditswe ba ne ba sa tshwanela. Ke gone yang kwa marakanelong a ditsela, mme botlhe ba lo tlaa ba fitlhelang, lo ba reye lo re ba tle modirong wa nyalo.”

Batlhanka ba kgosi ba ya kwa marakanelong a ditsela “ba phutlha botlhe ba ba ba fitlhelang, ba ba bosula le ba ba molemo.” E ne e le batho ba mefutla yotlhe. Bangwe ba ne ba sena sepe le mong wa modiro fela jaaka ba ba neng ba gana go tla lenyalong. Bantlha go bidiwa ba ne ba gana ka mabaka a gore ba ne ba ka seke ba tlogela mekgaphi ya bone e neng ba tsaya gore e botlhokwa go na le go tla lenyalong. Mme mo go ba ba amogetseng tlaletso go ne go na le ba ba tlang fela go bona gore go ka ba solofela molemo jang.  Ba ne ba tla go ja dijo tsa lenyalo e seng go tlotla kgosi.

Fa kgosi e tsena go tlhatlhoba balalediwa, mokgwa wa nnete wa botlhe o ne wa senolega. Mongwe le mongwe wa balalediwa o ne a filwe seaparo sa lenyalo. Seaparo se e ne e le mpho go tswa ko kgosing. Ka go apara seaparo balelediwa ba ne ba supa tlotlo mo go mong wa modiro. Mme monna mongwe o ne a apere diaparo tsa gagwe tsa gale. O ne a ganne go ipaakanya jaaka kgosi a ne a batla. Seaparo se a neng a gana go se apara e ne e le sa tlhotlhwa e ko godimo. Ka jalo o tlhapaditse morena wa gagwe. E rile kgosi a botsa gore:“O tsene jang o sena seaparo sa lenyalo?” o ne a sena karabo. O ne a itshekisa. Mme kgosi ya re, “Mmogeng mabogo le maoto, le mo latlhele kwa ntle, kwa lefifing le kwa ntlentle”

Go tlhatlhoba balalediwa ko modirong ke kgosi go emetse tiro ya katlholo. Balalediwa ke ba ba reng ba ineetse mo Modimong, ba maina a bone a kwadilweng mo lokwalong lwa botshelo. Mme ga se botlhe ba ba reng ke Bakeresete ba e leng barutwana ba nnete. Pele ga tuelo ya bofelo e ntshiwa, go tshwanetswe ga tlhatlhobiwa gore ke ba fe ba ba tlaa nnang le tshwanelo ya go nna le seabe sa boswa jwa baitshepi. Tshwetso e, e tshwanetswe ya dirwa pele ga go tla labobedi ga ga Keresete mo marung a selogodimo; ka gore fa a tla, tuelo ya Gagwe o na le yone go “duela mongwe le mongwe ka fa tiro ya gagwe e ntseng ka teng” Tshenolo 22:12. Pele ga a tla, go raya gore mokgwa wa tiro ya mongwe le mongwe go tla bo go tserwe tshwetso ka one, ka jalo mongwe le mongwe wa balatedi ba ga Keresete o tla newa tuelo go lebilwe ditiro tsa gagwe.

Fa re santse rele mo lefatsheng tiro ya katlholo ya ditlhotlhomiso tsa mekgwa ya batho yone e tsweletse ko legodimong. Matshelo a botlhe ba ba reng ke ba Keresete a kanokiwa ke Modimo. Matshelo otlhe a tlhatlhobiwa ka fa se se kwadilweng mo dikwalong tsa legodimo, mme go ya ka fa ditirong tsa botlhe, go tla atlholwa fela jalo ka botsakhutleng.

Mo setshwantshong se, seaparo sa lenyalo se emetse popego e e phepa e senang selabe e balatedi ba ga Keresete ba tshwanetseng ke go nna le yone. Phuthego e neelwa gore e “ikapese ka leloba le le boleta,le le phatsimang le le ntle” “le le senang selabe le fa e le khuana, le fa e le sepe se se ka nnang jalo”. Baefeso 5:27. Leloba le le boleta, go bua Baebele, “ke tshiamo ya baitshepi” Tshenolo 19:8;  Ke tshiamo ya ga Keresete, ye e senang selabe, ye a e balelang botlhe ba ba mo amogelang ka tumelo jaaka Mmoloki.

Seaparo se se sweu se se supang go tlhoka molato se na sa aparwa ke batsadi ba rona ba ntlha ga ba bewa ke Modimo mo Edene yo boitshepo. Ka fa ba neng ba tshela ka teng go ne go le ka fa thatong ya Modimo. Dinonofo tsotlhe tsa maikutlo a bone ba ne ba di file Rara wa bone wa legodimo. Lesedi le le ntle la Modimo le ne le dikaganyeditse bobedi jo bo boitshepo.  Lesedi le e ne e le sekai sa semowa sa bone sa go tlhoka molato. Ha ne ba ile ba tswelela ba le boikanyo mo Modimong le ne tla tswelela le ba dikaganyeditse. Mme e rile sebe se tsena, ba kgaola bokopano ja bone le Modimo, mme lesedi le le neng le ba dikagenyeditse la tswa mo go bone. Jaanong ka ba ne ba sa apara ebile ba tlhajwa ke ditlhong, ba ne ba leka go ikapesa matlhare a baa logileng boemong ja diaparo tsa selegodimo.

Se ke se batlodi ba molao wa Modimo ba se dirang fa e sale Adamo le Efa ba tlhoka kutlo. Ba logile matlhare e le go leka go khurumetsa bosaikatlegang jwa bone ka ntlha ya go tlola molao wa Modimo. Ba apara diaparo tse ba diiteretseng, ka ditiro tse e leng tsa bone, ba leka go khurumetsa dibe tsa bone, gore ba amogelesege mo Modimong.

Mme se ga se kake sa kgonega. Ga go na se motho a ka se itirelang go nna boemo jwa seaparo se se mo latlhegetseng sa go tlhoka molato. Ga go na yo a tla aparang seaparo sa matlhare, kgotsa sa selehatshe, yo tla nnang le Keresete le baegele ko dijong tsa lenyalo la Kwana.

Ke fela fa re apere seaparo sa ga Keresete re ka kgonang go tla fa pele ga Modimo. Seaparo se, se e leng tshiamo ya ga Keresete, o se apesa mongwe le mongwe yo o ikwatlhayang a ba a dumela mo go Ene.  A re “Ke a go gakolola, reka mo go Nna…..diaparo tse ditshweu gore o tle o ikapese, le gore ditlhong tsa bosaikatlegang jwa gago di se senolwe” Tshenolo 3:18

Seaparo se, se logilwe ko legodimong, ga sena tlhale lefa e le nngwefela ya setho. Keresete mo sethong sa gagwe a dira popego e e phepa, mme yone popego e, o batla go e balela mongwe le mongwe wa rona. “Ditshiamo tsotlhe tsa rona di ntse jaaka seaparo se se leswe.” Isaia 64:6. Sengwe le sengwe se re se dirang ka borona se lesofaditswe ke boleo. Mme Morwa Modimo o “bonatshitswe gore a tlose boleo ja rona; mme mo go Ene ga go na boleo.” Boleo bo tlhalosiwa e le “tlolo ya molao” 1 Johane 3:5,4. Mme Keresete o ne a le kutlo mo molaong otlhe. O bua jaana ka ga Gagwe “Ke itumela thata go dira go rata ga gago, Modimo wa me; ee, molao wa gago o mo teng ga pelo ya Me” Pesalema 40:8. Fa a le mo lefatsheng o reetse barutwana ba gagwe a re, “Ke tshegeditse ditaolo tsa ga Rre” Johane 15:10. Ka go tshegetsa ditaolo go sena le fa e le tlolo mo go ope, o dirile gore go kgonagale gore monwe le mongwe o ka tshegetsa ditaolo tsa Modimo. Fa re ineela mo go Keresete, pelo e kopana le pelo ya ga Gagwe, thato e nna thato ya Gawe, dikakanyo di laolwa ke Ene; re tshela botshelo jwa Gagwe. Se ke sone tlhaloso ya go apara seaparo sa tshiamo ya Gagwe. Go bo go raya gore fa Morena a re leba, gaa bone seaparo sa matlhare, kgotsa bosaikatlegang le bogole jwa sebe, mme o bona seaparo sa tshiamo ya Gagwe, e leng go tshegetsa molao wa ga Jehofa go sena leha e le tlolo mo go ope.

Ba lalediwa ko modirong ba ne ba tlhatlhobiwa ke kgosi. Go ne go amogelwa fela ba ba dirileng se kgosi e se batlang e leng go apara seaparo sa lenyalo. Mme go ntse fela jalo ka modiro wa mafoko a molemo. Botlhe ba tlhatlhobiwa ke kgosi Kgolo, mme go amogelwa fela ba ba apereng tshiamo ya ga Keresete.

Tshiamo ke go dira se se siameng, mme botlhe ba ya go atlholwa ka di tiro tsa bone. Dipopego tsa rona di senolwa ke ditiro tsa rona. Ditiro ke tsone di supang gore a tumelo ke ya nnete.

Ga go a lekana gore re dumela gore Jeso ga se motsietsi, gore tumelo ya Baebele ga se dithamalakane. Re kgona go dumela gore ka leina la ga Jeso ke gone fela re ka bolokiwang, mme e be re sa mo dire Mmoloki wa rona ka tumelo. Ga go a lekana gore re ipolele gore re Bakeresete le gore maina a rona a kwadilwe mo dikwalong tsa phuthego. “Yo o tshegetsang ditaolo tsa Modimo o nnela ruri mo go One, le One mo go ene. Mme re a itse ka gone mo fa Modimo o nnetse ruri mo go rona, ka Mowa o O re neileng.” “Ke gone ka fa re itseng ka teng fa re Mo itse, fa re tshegetsa ditaolo tsa Gagwe.” 1 Johane 3:24; 2:3. Jo ke jone bosupi jwa boammaruri jwa tshokologo ya rona. Go ipolela ga rona ga go na mosola, fa Keresete a sa supege ka ditiro tsa tshiamo.

Nnete e tshwanetse ya jalwa mo pelong. E tshwanetse ya laola tlhaloganyo le maikutlo. Popego yotlhe e tshwanetse ya kanelwa ka bomodimo. Lefoko lotlhe la Modimo le tshwanetse la diragadiwa mo botshelong.

Yo nnang moabedwi wa tlholego ya bomodimo o tla tsamaelana le molao wa Modimo o boitshepo. Ye ke yone tsela e Modimo a kalang ditiro tsa motho. Ke yone e dirisiwang go tlhatlhoba popego mo katlholong ya legodimo.

Bontsi bo bua gore Keresete ka loso lwa Gagwe o nyeleditse molao; mme se se kgatlhanong le mafoko a ga Keresete, “Lo se ka lwa itlhoma gore ke tsile go senya molao le fa e le baperofeti; ga ke a tla go senya, fa e se go tlhomamisa .….Go tsamaya legodimo le feta le lefatshe, ga go ketla go feta tlhasenyana epe, le fa e le lonakanyana lope fela mo molaong” Matheo 5:17, 18. Keresete o ne a swa go direla motho tetlanyo le Modimo ka ntlha ya molao o o tlodilweng. Fa ne go kgonagala gore malao o fetolwe kgotsa o beelwe ka fa thoko, go ka bo go ne go sa tlhofale gore Keresete a swe.  Ka botshelo jwa Gagwe mo lefatsheng o ne a tlotla molao wa Modimo. Ka loso la Gagwe a supa gore molao o nnela ruri. O file botshelo jwa Gagwe e le setlhabelo, e seng gore molao wa Modimo o senngwe, e seng gore boleng jwa one bo fokodiwe, mme e le gore tshiamo e tlhomamiswe, gore molao o supega fa o sa fetoge, gore o nnela ruri ka bosakutleng.

Satane o ne buile gore ga go kgonege gore motho o ka tshegetsa molao wa Modimo; ka nonofo ya rona ke nnete ga go kgonege gore re ka o tshegetsa. Mme Keresete o tsile mo tshwanong ya setho, mme ka go tshegetsa molao otlhe, O ne a tlhomamisa gore setho le bomodimo fa di kopane go a kgonagala gore nngwe le nngwe ya ditaolo tsa Modimo e ka tshegetswa.

 “Mme botlhe ba ba mo amogetseng, a ba naya nonofo ya go nna bana ba Modimo, e bong bone ba ba dumetseng mo ineng la gagwe” Johane 1:12. Nonofo e ga e mo sethong. Ke nonofo ya Modimo. Fa motho a amogela Keresete, o amogela nonofo ya go tshela botshelo ja ga Keresete.

Modimo o batla bophepa mo baneng ba Gagwe. Molao wa Gagwe ke boleng jwa Gagwe, mme molao ke mokgele kgotsa sekale sa popego nngwe le nngwe. Sekale se, sa bosakhutleng, se bewa pele botlhe gore go senne le ope yo tla tsietsegang ka mokgwa wa batho ba ba tla nnang mo bogosing jwa Gagwe. Botshelo jwa ga Keresete mo lefatsheng e ne e le se supo sa go tshegetsa molao wa Modimo go sena gope fa o tlolwang teng, mme ba ba reng ke bana ba Modimo, ba tshwana le Keresete mo popegong, ba tla tshegetsa molao wa Modimo. Ke gone fela Modimo a ka ba tshephang go nna mo palong ya losika lwa legodimo. Ka gore ba apere seaparo se sentle sa tshiamo ya ga Jeso, ba na le bonno ko modirong wa Kgosi.  Ba na le tshwanelo ya go kopana le ba ba tlhatswitsweng ka madi a Kwana.

Monna yo tsileng ko modirong a sa apara seaparo sa lenyalo o emetse seemo sa ba bantsi mo lefatsheng gompieno. Ba ipolela gore ke Bakeresete, ba re masego le ditshono tsa mafoko a molemo ke tsa bone; mme ba bona go sa tlhokafale gore go kanna le phetogo ya popego mo go bone. Ga ba ise ko ba ikwatlhaele sebe ka boammaruri. Ga ba bone botlhokwa ja go nna le Keresete mo pelong kgotsa gonna le tumelo mo go Ene. Ga ba ise ba fenye mekgwa ya bone e sa siamang e ba e tsereng mo batsading ba bone. Mme ba bona ba siame ka bo bone, boo ba ikaega mo tshiamong ya bone go na le go tshepha mo go Keresete. Ke bautlwa ba lefoko, ba tla modirong, mme ga ba apara seaparo sa tshiamo ya ga Keresete.

Bontsi jwa ba ipitsang gore ke Bakeresete, ya bo e le ba ba dirang ditiro tsa tshiamo ka dinonofo tsa bone fela go sena Keresete mo teng. Ba ganne mpho fele e nosi e e ka ba dirang gore ba tlotle Keresete ka go mo emela mo lefatsheng. Tiro ya Mowa O Boitshepo mo go bone ke selo se se sa tlwaelesegang. Ga se badire ba lefoko. Ditsetlana tsa selegodimo tse di farologanyang ba e leng ba ga Keresete le ba e leng ba le fatshe ga di sa tlhole dibonala. Ba ba reng ke balatedi ba ga Keresete ga e sa tlhole e le batho ba ba pharologanyo gape ba haphegileng. Tsela e e ba haroganyang ga e bonale. Batho ba ikobela lefatshe, mekgwa ya lone, di tsamaiso tsa lone, bohatha jwa lone. Phuthego e ile ko lefatsheng mo go tloleng molao wa Modimo, mme e ne e tshwanetse gore e nne lefatshe le le tlang mo phuthegong ka go tshegetsa molao wa Modimo. Tsasi le le tsatsi phuthego e sokologela ko lefatsheng.   

Ba botlhe ba solofela go bolokwa ka loso lwa ga Keresete, mme ba gana go tshela botshelo jwa Gagwe. Ba boka dikhumo tsa tshegofatso tse di fiwang mahala, le go leka go ikhurumetsa ka tebego ya tshiamo, ba solofela gore go tla thiba ditshokamo tsa dipopego tsa bone; mme maiteko a bone ga a na go nna le mosola mo letsatsing la Modimo la tsheko.

Tshiamo ya ga Keresete ga e kake ya khurumetsa sebe lefa e le se se nngwe fela se se ratiwang mo pelong. Motho e ka tswa e le moroba molao mo pelong; mme ga a sa robe molao ope mo matlhong a batho, lefatshe le tla mmona e le motho yoo tshegetsang molao. Mme molao wa Modimo o leba diphiri tsa pelo. Tiro nngwe le nngwe e atlholwa go lebeletswe lebaka le le dirileng gore tiro eo e dirwe. Ke fela mabaka a a tsamaelanang le ditsetla tsa molao wa Modimo a tla emang mo katlholong.

Modimo o lorato. O supile lorato le ka mpho ya ga Kereste. Fa “A ntsha Morae, yo tsetsweng a le esi, gore le fa e le mang yo dumelang mo go Ene a seka a nyelela, mme a nne le botshelo jo bosakhutleng,” Ga a ka a gana ka sepe mo go ba ba rekolotsweng. (Johane 3:16) O re file legodimo lotlhe, ko re ka bonang teng nonofo, gore re se ka ra fenngwa ke mmaba wa rona yo mogolo. Mme lorato la Modimo ga lo dire gore A fe seipato sa sebe; Ga A ka a fa Satane seipato; ga A ka a fa Adamo kgotsa Kaene seipato; e bile ga A kake a dira jalo mo go ope. Ga A kake a letelela ka sephiri maleo a rona, kana A tlodisa matlho dipopego tsa rona tse di nang le bogole. O solofela gore re fenye ka leina la Gagwe.

Ba ba ganang mpho ya tshiamo ya ga Keresete ba gana mokgwa wa popego e e ka dirang gore ba nne bana ba Modimo. Ba gana se ka nosi se ka ba dirang gore ba tshwanelwe ke go nna le bonno mo modirong wa lenyalo.

Mo setshwantshong, e rile kgosi a botsa “O tsene jang o sa apara seaparo sa lenyalo?” monna o ne a sena puo. Mme go tla nna fela jalo mo letsatsing le le golo la katlholo. Gompieno batho ba ka fa diepato tsa dipopego tsa bone, mme mo tsatsing leo ga ba na go nna le seipato.

Diphuthego tse diipitsang gore ke tsa ga Keresete mo pakeng eno di tlhatloseditswe ka di tshono tse di ko godimo. Morena o bontshitswe mo go rona ka lesedi le le golelang ko godimo. Ditshono tsa rona di feta tsa batho ba bogologolo.  Ga re a tshola lesedi le le filweng Isaraela fela, re tshotse gape bosupi jwa poloko e kgolo e re e tiseditsweng ka Keresete.  Se e neng e le meriti le dikai mo Bajuteng ke boammaruri mo go rona. Ba na le ditso tsa Testamente e Kgologolo; rona re na le yone le Testamente e Ntšha. Re na le tlhomamiso ya Mmoloki yo o tsileng, Mmoloki yo bapotsweng, yo o tsogileng, mme a bua godimo ga sefikantswe se se phatakantsweng sa ga Josefa a re,“Ke nna tsogo le botshelo.” Ka kitso ya rona ya ga Keresete le lorato lwa Gagwe, bogosi jwa Modimo bo beilwe mo gare ga rona. Keresete o supiwa mo go rona mo ditherong le mo dipineng. Modiro wa semowa o adilwe fa pele ga rona ka letlotlo. Seaparo sa lenyalo se se sigilweng ka tlhotlhwa e kgolo se fiwa mongwe le mongwe a sa duele sepe.

Ka barongwa ba Modimo re bewa pele tshiamo ya ga Keresete, go siamiswa ka tumelo, ditsholefetso tse dikgolo tse ditlhotlhwa tsa lefoko la Modimo, go tsena ko go Rara ka Keresete re sa duele sepe, kgomotso ya Mowa O Boitshepo,  go tshephiswa botshelo jo bosakhutleng mo bogosing jwa Modimo. Tota Modimo o ka re direlang eng gape se a sa se dirang go re baakanyetsa dijo tse dikgolo tsa modiro wa legodimo?

Ko legodimong baengele ka bodiredi ja bone ba re: Bodiredi jo re neng re bo filwe gore re bo dire re bo dirile. Re kgoromeleditse ko morago masole a baengele ba ba bosula. Re rometse lesedi mo dipelong tsa batho, re ba gakolotse ka lorato lwa Modimo le le supilweng ke Jeso. Ra lebisa matlho a bone ko mokgorong. Dipelo tsa bone di ne tsa tshikhinngwa ke kakanyo ya sebe se se bapotseng Morwa Modimo. Ba ne ba bona gore se se buiang ke nnete. Ba ne ba bona dikgato tse ba tshwanetseng ke go di tsaya gore ba sokologe; ba ne ba tshikhinngwa ke nonofo ya mafoko a molemo; dipelo tsa bone tsa nolofala fa ba bona monate wa lorato lwa Modimo. Ba bona popego e ntle ya ga Keresete. Mme mo go ba bantsi tse tsotlhe e ne e le lehela. Ba ne ba gana go ineele mekgwa ya bone. Ba ne ba gana go apola seaparo sa lefatshe gore ba apare sa legodimo. Dipelo tsa bone di ne diineetse mo bopelotshetlheng. Ba ne ba rata botsalano jwa lefatshe go na le jwa Modimo wa bone.

Letsatsi la katlholo ya bofelo le tlaa nna masisi . Mo ponatshegelong moapostolo Johane o le tlhalosa jaana: “Ka bona setulo se segolo se se sweu sa bogosi, le Ene yo o dutseng mo go sone, yo lefatshe le legodimo di tshabileng sefatlhogo sa gagwe; mme ga se ka ga fitlhelwa fa di ka nnang teng. Ka bona baswi, bagolo le bannye, ba eme fa pele ga setulo sa bogosi; mme dikwalo tsa bulwa; lokwalo lo longwe lwa bulwa, lo e leng lokwalo lwa botshelo; mme baswi ba atlholwa ka dilo tse di kwadilweng mo dikwalong, ka fa ditirong tsa bone.” Tshenolo 20:11,12.

Go tla nna bohutsana tsatsi leo ha batho ba leba ditiro tsa bone tse di fitileng ba lebagane le bosakhutleng. Botshelo jotlhe jwa bone bo tla itshupa fela jaaka bo ne bo ntse. Menate ya lehatshe, dikhumo tsa lone, le tlotlo ya lone di tlaa bo di se botlhoka mo letsatsing leo. Batho ke gone ba tla bonang gore tshiamo ya ga Jeso e ba e ganneng ke yone fela e e leng botlhokwa. Ba tla bona gore ba betlile dipopego tsa bone ka fa ditsietsong tse di bohitlha tsa ga Satane. Diaparo tse ba di tlhophileng ke sesupo sa boineelo jwa bone mo go Satane. Mme ke gone ba tla bonang maduo a boitlhophelo ja bone. Ba tla nna le kitso ya gore go tlola ditaolo tsa Modimo go tewang eng.

Go tla bo go sa tlhole go na le sebaka sepe se se filweng motho gore a ipaakanyetse bosakhutleng.  Ke mo botshelong jo, mo re tshwanetseng  go apara seaparo sa tshiamo ya ga Keresete teng. Ke sone sebaka fela se re se filweng go bopa di popego tse di tla tsenang ko legaeng le Keresete a le baakanyeditseng ba ba tshegetsang ditaolo tsa Gagwe.

Malatsi a rona a re a filweng go sokologa a tla bokhutlong ka bofefo. Bokhutlo bo gaufi. Mo go rona go tla tlhagiso ya gore“Lo itlhokomele, gore e se re kgotsa dipelo tsa lona tsa imelelwa ke go kgora bobe, le go tagwa, le ke ditlhodiego tsa botshelo jono, mme letsatsi leo la lo wela ka tshoganetso jaaka seru” Luke 21:34. Lo itlhokomela gore letsatsi leo le seka la go fitlhela o sa ipaakanya kgotsa o fitlhelwe o le ko modirong wa Kgosi o se na seaparo sa lenyalo.

 “Morwa Motho o tlaa tla ka nako e lo sa mo solofeleng ka yone.” “Go sego yo o disang, a boloka diaparo tsa gagwe, gore a se tsamaye a sa apara, mme batho ba bona ditlhong tsa gagwe.” Mathaio 24:44; Tshenolo 16:15. Amen.